I dTeach an Ard-Mhéara, Baile Átha Cliath, ar an 21 Eanáir 1919 a osclaíodh an chéad Dáil Éireann go foirmiúil. Den 69 dteachta a toghadh chun na Dála, 27 is ea a d’fhreastail ar an gcéad chruinniú; bhí an 42 eile ar iarraidh, a bhformhór i bpríosún. Bhí timpeall 2,000 duine i láthair ar an ócáid, iriseoirí a bhformhór.

Chuir rialtas na Breataine toirmeasc le Dáil Éireann i Meán Fómhair 1919, agus ón bpointe sin amach mhéadaigh ar an gciapadh ar airí agus oifigigh na Dála, ionas gurbh éigean dóibh a gcuid cruinnithe a thionól in áiteanna éagsúla. Dá bhrí sin, ba bheag reachtaíocht a ritheadh, cé gur éirigh leo rudaí eile a bhaint amach, mar shampla £370,00 a bhailiú trí Iasacht Náisiúnta Dháil Éireann.
Faoin am ar osclaíodh Dáil Éireann go foirmiúil, bhí an foréigean idir na náisiúnaithe agus fórsaí na Breataine ag géarú. Ar an lá a tionóladh chéad chruinniú na Dála, an 21 Eanáir 1919, rinne naonúr Óglach as 3ú Briogáid Thiobraid Árann luíochán ag Sulchóid Bheag, Co. Thiobraid Árann. Ag féachaint siar, d’áireofaí an luíochán ag Sulchóid Bheag mar an gcéad chomhrac i gCogadh na Saoirse.
Beidh an taispeántas ann go deireadh 2019, agus beidh imeachtaí éagsúla ar théamaí gaolmhara á n-eagrú i gcaitheamh na bliana.