Buail isteach chuig Crónán na mBeach, taispeántas ina rachaimid ar thuras go domhan an-spéisiúil bheacha na hÉireann.

An raibh a fhios agat go bhfuil níos mó ná 100 speiceas éagsúil beach in Éirinn, ach nach ndéanann ach ceann amháin de na speicis sin mil? Nó go raibh beacha chomh tábhachtach sin i stair na hÉireann go bhfuil a n-éarlamh féin acu fiú?

Bígí linn chun ceiliúradh a dhéanamh ar dhraíocht bheacha na hÉireann, ar a ról ríthábhachtach sa dúlra, agus ar an gceangal speisialta atá acu linn.

Faigh amach an fáth a bhfuil an teideal ‘éarlamh na mbeach’ ar Naomh Gobnait in Éireann agus faigh amach faoi shaol na mbeach laistigh den choirceog.

Faigh amach conas a chuaigh beacha i gcion ar ár gcultúr leis na céadta bliain, agus déan iontas dár saothair ealaíne agus dár ndéantáin atá spreagtha ‘ag na beacha’.

Tugann an t-ábhar Stair an Dúlra atá sa taispeántas léargas neamhghnách do chuairteoirí ar dhomhan suimiúil agus neamhghnách bheacha na hÉireann. Tá samplaí de gach speiceas beiche in Éirinn ar taispeáint, chomh maith le speicis eile beach agus feithidí ó thimpeall an domhain. Foghlaimeoidh cuairteoirí faoi na difríochtaí idir beacha meala, bumbóga, agus lear mór beach aonair éagsúil, agus b’fhéidir go mbeadh ionadh orthu a fháil amach cé mhéad speiceas atá le fáil in Éirinn.

Tabharfaidh mionsamhail lánléargais coimisiúnaithe den taobh istigh den choirceog léargas neamhghnách do chuairteoirí ar dhomhan eagraithe agus struchtúrtha na mbeach. Taispeántar saol na mbeach meala saothrach le hais neadacha caomhnaithe de bheacha aonair, bumbóg agus speicis feithidí sóisialta eile nach bhfuil an cur amach céanna againn orthu.

Cuireann mionleagan de choirceog Lego a bhuaigh Curiarracht Dhomhanda Guinness agus a chruthaigh Ruairí Ó Leocháin, múinteoir scoile as Baile Átha Luain, le linn dianghlasáil 2020, gné den spraoi leis.

Bronnadh an choirceog adhmaid, a rinne John Gallagher, as Béal Leice, Co. Fhear Manach, ar an Músaem i 1997. Léiríonn sé an scil agus an cheardaíocht a ghabh le beachaireacht leis na céadta bliain.

Is féidir le cuairteoirí ar an taispeántas féachaint, leis, ó áit amhairc ghloine a bhreathnaíonn amach ar ghairdín fraoch, ar bheacha meala ag eitilt isteach agus amach as coirceoga gníomhacha ar bharr díon Ard-Mhúsaem na hÉireann – Saol na Tuaithe. Beachairí áitiúla is ea a thugann aire do choirceoga an Mhúsaeim.

‘Gúna Beachach’ ’ le Alice Maher

Tá ‘Gúna Beachach’(1994), le Alice Maher, ar taispeáint anois mar chuid den taispeántas Crónán na mBeach ag Páirc Thurlaigh.

Tá an gúna beag seo déanta as beacha meala, céir, cadás agus sreang. Déantar machnamh leis ar théamaí a bhaineann leis an bhfeimineachas, an mhiotaseolaíocht agus an leanbaíocht.

Tapaigh an deis seo an ‘Gúna Beachach’ a fheiceáil agus é ar iasacht ó National Museums Northern Ireland go dtí luath sa bhliain 2025.